Sê nou net die Bybel was eksklusief vol stories oor die engele.
Dit sou fassinerend wees en ons sou baie geleer het oor wie God is en hoe
Hy met hierdie wesens werk.
Maar ons is mense ... Wat sou ons te wete gekom het van hoe God
met mans en vroue, seuns en dogters van vlees en bloed werk? Wat sou
ons oor onsself as deel van Sy skepping ontdek het?
Nie veel nie ... maar gelukkig is God se heilige boek propvol onheilige
mense. Dis groot genade! En dis een van die grootste voorregte om oor
daardie mense te mag oplees, praat, skryf, preek, redekawel en studies
doen.
Hierdie boek is nie ’n deftige verhandeling of diepgaande studie
van die mense in die Woord nie. Dis ’n plesierige verkenning van ’n
paar karakters aan die hand van ’n bepaalde vertrekpunt, naamlik die
Vierkleurtemperamentmodel.
O ns gaan vir jou ’n kort oorsig oor hierdie model gee en dan kleur
vir kleur na ’n paar van die bekende persone in die Bybelse verhale kyk.
Dit beteken kortom dat hierdie mense se optrede aan die hand van hulle
(moontlike) temperament verduidelik word.
Mense verskil van mekaar – en dis oukei. In die Bybel verskil mense
ook van mekaar – en dit was vir God oukei. Hy het ’n verhouding met
hulle gehad waarbinne hulle hul unieke swakpunte kon oorkom en hulle
sterkpunte kon uitbou.
16
Dit is die waarheid wat ons as skrywers die naaste aan die hart lê:
Dat jy sal ontdek dat jy deur die krag van die Heilige Gees presies die
mens kan wees en word wat God bedoel het jy moet wees. En dat jy dit
kan wees met jou unieke temperamentsamestelling.
Die laaste hoofstuk handel oor hoe mense in hulle geloofslewe van
mekaar verskil. Ons dink ’n bietjie saam met jou oor hoe Jesus, terwyl Hy
op aarde was, met al vier die temperamente in kontak was en wat dit vir
ons as Sy volgelinge beteken.
O ns verkenningstog is nie rewolusionêr nie. Dis ’n pad waarop ander
skrywers en kenners reeds bakens ingeplant het. Maar mense het gevra
vir hierdie boek. Mense wat my (Lynette se) preke en aanbiedings oor die
temperamente en Bybelkarakters bygewoon het.
Helaas is my skryftyd beperk en daarom het ek vir Hanneke genooi
om saam te skryf. Dit is nou ons twee se voorreg en ons vreugde
om hierdie gedagtes en idees met jou te deel. Dalk is alles vir jou
splinternuut, dalk al half bekend ...
Mag jy iets verrassends oor jouself ontdek. Mag jy iets kosbaars van
iemand vir wie jy lief is opeens waardeer. Mag jy ’n ekstra stukkie begrip
vir ’n kind, kollega, vriend of vreemdeling ontwikkel.
Mag ou, bekende verhale vars en verrykend voor jou oopgaan omdat
jy die karakters in ’n ander lig sien. Mag die lig van God se Woord ’n rapsie
helderder op jou lewenspad skyn. Mag jy bowenal nader aan God die
Vader, Seun en Heilige Gees groei.
Dis ons gebed vir jou en hierdie boek
Seeds of Inspiration (Pty) Ltd t/a Lynette Beer | Registration Nr: 2011/134865/07
Po Box 41921, Moreleta Ridge, Pretoria, South Africa, 0044
Copyright © 2023 Digital Zoo Website Design Company - All Rights Reserved
Domain Registration
|
Email Address
|
Website Design
|
Graphic Design
|
Social Media Management
|
Search Engine Optimization
|
Online Marketing
|
Web App Developer