Ek ontvang ’n e-pos van ’n dame wat moedeloos en intens ongelukkig is weens ’n onaangename verhouding met haar werkgewer. Sy het ’n slagoffer geword van ’n gesagsfiguur wat baie goed is in haar werk, maar wat altyd humeurig, foutvinderig en afbrekend is. Iemand wat soort van behae daarin vind om ander mense te verneder.
Wanneer ek koerant lees, TV kyk of na gesprekke luister, besef ek al hoe meer dat daar baie sulke woedebevange mense in ons wêreld is. Mense is meer as ooit onder druk en as gevolg daarvan het eise en verwagtings ook gestyg en wanneer daar nie aan die eise en verwagtings voldoen word nie, verval jy maklik in ’n soort van broeiende woede wat tot ernstige depressie kan bydra.
“Daar is een wat onverskillige woorde uitspreek soos swaardsteke, maar die tong van die wyse is genesing.” En in Spreuke 13:3: “Iemand wat versigtig praat, beskerm homself, maar iemand wat ’n groot mond het, kom in die moeilikheid.”
Let bietjie op wanneer jy weer in so ’n altyd-kwaad persoon se teenwoordigheid is – hulle is altyd besig om ander mense seer te maak en op hulle plek te sit. Dit laat my soms van frustrasie kreun om in die teenwoordigheid van sulke mense te wees.
Ek het egter besef dat sulke mense die produk van hulle lewensomstandighede geword het. Die hartseer is dat niemand
tere gevoelens van simpatie koester teenoor so ’n persoon of probeer om so ’n soort mens te verstaan nie.
Tensy so ’n persoon ’n werklike poging aanwend om te verstaan waarom hy of sy so optree, sal hy nooit by die wortel van sy kwaad uitkom nie, omdat al ons emosionele ervaringe deur vorige gebeurtenisse beïnvloed word.
